По благословению Манглисско-Цалкского Митрополита
Анания (Джапаридзе)

Акафист Преподобному и Богоносному Отцу Нашему Гавриилу Самтаврийскому



Святый преподобне, исповедниче и юродиве Архимандрите Гаврииле, моли Бога о нас!



«Мой крест - вся Грузия и пол-страны Русской, его я, как Моисей, сорок лет носил.»
Преподобный Гавриил исповедник и юродивый




Тропарь, глас 4
Яко Владыка Христос Божественное естество Свое / человеческим сокры, / и тако нам незримым содела / несказанное Величество Свое, / ты же, всехвальный отче Гаврииле, / Ему уподобился еси, / подвигом юродства сокрывый духовное сияние твое, / и исповедничеством Веры ставый пастырем истинным, / преподобный отче Гаврииле, // моли Христа Бога спастися душам нашим.


Кондак, глас 4
Необъятно есть милосердие Божие, / Егоже благостию лицезреем мы создание Им обоженное, / ты же отче преподобне,/ образ Создателя твоего в себе утвердил еси, / и вознесл еси страдании естество твое в подобие Божие,/ темже славим тя, отче Гаврииле, / яко достоин еси ты всякия похвалы, / был еси на земли цевница правды, проповедник любве и голубь чистоты, / а твоим всечудным смирением / открыл еси миру кладезь мудрости, / и ныне на Небеси ты еси // ходатаю милосердия Божия и нашего спасения.


Величание
Ублажаем тя, / преподобне отче Гаврииле, / и чтим святую память твою, / наставниче монахов / и собеседниче ангелов.






Молитвами святых отец наших, Господи Иисусе Христе, Боже наш, помилуй нас, аминь. Слава Тебе, Боже наш, слава Тебе. Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас. (Трижды) Слава Отцу и Сыну и Святому Духу, и ныне и присно и во веки веков. Аминь. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй. (Трижды) Слава Отцу и Сыну и Святому Духу, и ныне и присно и во веки веков. Аминь. Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Господи, помилуй. (12 раз): Слава Отцу и Сыну и Святому Духу. И ныне и присно и во веки веков. Аминь. Приидите, поклонимся Цареви нашему Богу. (Поклон) ; Приидите, поклонимся и припадем Христу, Цареви нашему Богу. (Поклон); Приидите, поклонимся и припадем Самому Христу, Цареви и Богу нашему. (Поклон); псалом 50-й, Помилуй мя, Боже: Верую: и чти акафист.
Кондак 1
Пением немолчным восхвалим житие и чудеса твоя, о всехвальне отче Гаврииле, ты яко светило великаго рода Иверскаго возсиял еси, и ныне молением сердечным усердно взываем ти, яко всемощному заступнику нашему и ходатаю пред Господем – призри на ны, отче святый, и защити в скорбех и искушениих, и отеческим дерзновением твоим отжени от нас болезни и напасти, умоли о нас всесильнаго Бога не попустити нам блуждати по распутием греховным, и от лукаваго исхити восхваляющих и поющих ти сице: Радуйся, святый исповедниче и Христа ради юродиве, преподобный отче наш Гаврииле!


Икос 1
Яко Израилю яви Господь пророки, зла обличители и пред Богом за люди Его ходатаи, тако и тя, отче, благослови Христос на дела великая, видя широту сердца твоего, и яко юродива, наставника и молитвенника дерзновеннаго яви нам, обличителя беззакония века и рода своего. Издетска посвятился еси служению Богу, нашего ради спасения, от страстей греховных и бед избавляя нас, такожде и по святей кончине твоей выну следуеши обету твоему, тепле печешися о людех, к тебе притекающих, и орлиным взмахом крилу' являеши помощь твою всем сущим в печалех и скорбех, терзаемым духи злобы, и исцеление щедро даруеши сице тебе вопиющим:

Радуйся, кротость и смирение с младенчества возлюбивый;
Радуйся, непорочности души и телесе усердный хранителю;
Радуйся, сосуде избранный, святости уделе;
Радуйся, измлада таин Вседержителя великий носителю;
Радуйся, обоюдоостре мечу Господень, неверных разяй;
Радуйся, слабоверных в Вере укрепителю и истины поборниче;
Радуйся, проповедниче любве вседивный;
Радуйся, кающихся грешников наставниче;
Радуйся, в схватце с богоборцы Христа-Спасителя истинный служителю;
Радуйся, последних времен Столпе Лучезарный;
Радуйся, Великий Архимандрите и старче, духовниче всея Иверии;
Радуйся, Свыше посланный ради очищения рода твоего;
Радуйся, святый исповедниче и Христа ради юродиве, преподобне отче наш Гаврииле!


Кондак 2
Врази веры истинныя, власть захвативше в стране нашей, учиниша гонение велие церкви Христовей и пастве ея, и напасть подобную претерпети могоша токмо избраннии, непоколебимии духом истиннии Веры исповедницы. Ты же, измлада сый сосуд Богоизбранный, аще и чадо родителей безверных, обаче Духом Святым преисполненный, и во дни гонений впитал еси с радостию благоухающий источник жизни Вечныя, величаяй выну Светодавца и Творца мира: Аллилуия.


Икос 2
Изде́тства, достоблаженне отче, образ смирения и богомыслия был еси, далече от всякия детския безпечности, услышав в отрочестве раннем имя Христово, притекл еси в церковь Святыя Варвары и, узрев Спасителя на Кресте, с плачем возопил еси к Нему, аки живу сущу: «Вскую распяша Тя?» И услышав ответ служителя, житие и деяния Христа познати твердо решил еси, тем же убо Святое Евангелие по горнему наитию купил еси и оттоле до конца дней твоих Слову Божию поучался еси. У Него¬ же испроси, милостивый отче наш, окропити нас росою благодати Его, дабы сердца наша горели неугасимым огнем Святаго Евангелия и воспевали ти сице:

Радуйся, от утробы матерни, яко Самуил-пророк, Богу посвященный;
Радуйся, духовным светом озаренный, и во мгле безбожия аки луч познания блиставый;
Радуйся, разумом своим от забот мирских удаливыйся и Богу прибли́живыйся;
Радуйся, от отроческих лет избра́нный и благодатию Божией просвещенный;
Радуйся, искреннею душею, непорочным разумом и жаждою слова Божия выну движимый;
Радуйся, душу свою уделом токмо Христа Царя предначертавый;
Радуйся, измлада влечением к Богу отмеченный и Священным Писанием оживленный;
Радуйся, духовное всеоружие на плечи детскеи взваливый;
Радуйся, резвость детскую на воздвижение церквей променявый;
Радуйся, растлевающия душу утехи возненавидевый;
Радуйся, сердце свое и плотская желания распявый;
Радуйся, благую силу и мудрость Новаго Завета - истиною, а знание святости - опытом жития твоего являвый;
Радуйся, святый исповедниче и Христа ради юродиве, преподобне отче наш Гаврииле!


Кондак 3
Видя неугасимый жар любве твоея ко Господу, коварный зверь, враг святости, взбесися неистово и набросився на тя, удари нечистою лапою главу твою, и негодуя вопияше отроку ревностному: «Да не подымеши очию твоею на небо более!». Обаче, смело вооруживыйся Крестом Господним и крепостию Его, стойко воспротивился еси, отроче богоизбранный, напастем вражиим. Помыслом же горним узрев храм, имя Святаго Георгия носивый и родителем твоим разруше́ный, с молитвою благоговейно воздвигл еси рукама твоима камени храмовы и, уложил я еси чудным образом, разумение человеков превосходящим, с радостию же и любовию Бога благодарил еси, воспевая Ему: Аллилуия!


Икос 3
Мати твоя, смутившися сицевою ревностностию твоею, поверже Святое Евангелие в место неподобное, обаче ты, яко сокровище честнейшее со слезами очистивый, дом твой оставил еси и отрок двунадесяти лету сый в монастырь поспешил еси, иноческаго жития паче всего желая, но понеже мал был еси, благословения не получил еси. И дни и нощи во дво́рех церковных проводил еси, величаяй Бога и не пекийся о мразе и гладе. И ныне, отче наш, моли Господа Бога подати нам мудрость сердечную, дабы уразумети добро и зло, дабы пути дольняго живота нашего проити праведно и обрести сицевое блаженное вдохновение и нам, восхваляющим и поющим ти:

Радуйся, веры гонимыя пламенный исповедниче;
Радуйся, неверием беснующихся посрамивый;
Радуйся, пламенных веры искателей крепкий заступниче;
Радуйся, пустыя утехи ненавидивый и порицания с благодарением принимавый;
Радуйся, нощи в молитвах проводивый и почиванием на ложе жестоцем тело твое удручавый;
Радуйся, беспечность юности постом и трудолюбием сокрушавый;
Радуйся, от ополчений демонов невидимых нас ограждаяй;
Радуйся, Авраамова гостеприимства подражателю;
Радуйся, от глада спасаяй и милосердием нищих одаряяй;
Радуйся, грешников сладости воздержания научаяй;
Радуйся, нищих и бедствующих надеждо;
Радуйся, греховных помысло́в отгонителю;
Радуйся, святый исповедниче и Христа ради юродиве, преподобне отче наш Гаврииле!


Кондак 4
В малей келии двора твоего уединения выну искал еси, усердно в молитве и чтении Святаго Евангелия подвизаяся, очи сердечнеи горе присно устремлял еси, напояя душу твою животворною росою благодати Духа Святаго, и ревнуя зело о тесноте жития твоего, темже добродетели обильно стяжал еси, и во смирении твоем глубин истин Божиих достигл еси, и сподобился еси узрети явление на небеси Лучезарнаго Креста, и приял еси е яко горнее знамение – яко Крест Голгофы твоея, величая Творца и Живодавца Христа Бога: Аллилуия!


Икос 4
Божиим промыслом притекл еси, отче, на гору святую, Мтацминда, в церковь Давида Гареджийскаго, и зде научился еси чтению псалтири и в учении христианстем утвердился еси, и не щадя сил твоих неустанно подвизался еси, святому храму служа, и, промыслом Божиим, яко саженец близ источника, в пору свою плод добрый взрастил еси. Тако покрый и нас, блаженне, от грехов и искушений мира, дабы страшитися нам убогаго разума нашего, но жити выну в воли Божией, благодать горнюю стяжающе, сего ради благоговейно взываем ти:

Радуйся, мысленныма очима сияющаго Господа непрестанно зревый;
Радуйся, смирением яко светом одеянный;
Радуйся, сокрытое от мудрецов и книжников познавый;
Радуйся, усердным постом и неустанными трудами закаливыйся и молитвою непрестанною пронизавыйся;
Радуйся, нечаянное проявление греха скорбию, стенании и слезами изжигавый;
Радуйся, крепостию неколебимою малодушным и слабым помощниче;
Радуйся, душ верных укрепителю и вражиих сил устрашителю;
Радуйся, величия Христова превозносителю и разнузданности богоборцев сокрушителю;
Радуйся, тщеславия сильных мира, от лукаваго зверя идуща, попирателю;
Радуйся, души христиан, от многолетняго гнета нечестивых страждущия, ободривый;
Радуйся, слабых и немощных укрепителю;
Радуйся, ищущих Истину на пути Господни наставителю;
Радуйся, святый исповедниче и Христа ради юродиве, преподобне отче наш Гаврииле!


Кондак 5
Егда усилишася нечестия и гонения на верных, мнози от жития иноческаго отрешишася, и по понуждению, от страха смертнаго, в дольняя селения притекоша и приступиша к жизни мирстей. Ты же, отче, стезю тесную крепце избрал еси, ведущую к радости непреходящей, и Сионский храм стойко охранял еси, с верностию алтарю служа. Нечестивии убо храмы Божия разоряху, ты же церковь в притворе дома твоего воздвигл еси, и непрестанно святыя образы и кресты искал еси, обретая я поруганныя в неподобающих ме́стех, и, благолепно украсив я, в храме твоем помещал еси, идеже мы с радостию я и ныне почитаем, отче наш, со умилением воспевающе Богу: Аллилуия!


Икос 5
Яростным мщением за пламенную ревность твою, множество бед от зверя коварнаго на тя навалишася , дабы потушити огнь рвения твоего ко Господу. Якоже попусти Господь скорби Иова Многострадальнаго, дабы веру его испытати, темже же и ты, отче, козней бесовских не устрашился еси, и трижды разруше́ную церковь паки воздвигал еси, всякий раз благолепнее сотворив ю. Понеже благослови Господь труд сей благий, меры песка Ангели подаваху ти, и ныне, отче, моли Христа Бога всякое зло отгнати от нас, в скорбех укрепити и поставити на стезю покаяния, темже с радостию и любовию взываем ти:

Радуйся, во граде велием, яко пустынник, мира соблазны отринувый;
Радуйся, немощи иных на себе взваливый;
Радуйся, всякое уныние, от лукаваго сущее, горячею молитвою искоренивый;
Радуйся, Духом Святым окрыленный, ряды врагов невидимых сокрушивый;
Радуйся, Священным Писанием закаливыйся и мудростию совершенным ставый;
Радуйся, ангелов соратниче и братий порочных исправителю;
Радуйся, ко бдению и трезвению всех призываяй;
Радуйся, чудотворную Вратарницу Иверскую, главнейшую заступницу Грузии, вельми возлюбивый;
Радуйся, спасенными дивными иконами Храм твой убравый;
Радуйся, огненныя любве ко Господу в сердцах наших воспламенителю;
Радуйся, пред Богом сладчайший о иверех ходатаю;
Радуйся, ко Трапезе Господней на Небеси любве нашея преподносителю;
Радуйся, святый исповедниче и Христа ради юродиве, преподобне отче наш Гаврииле!


Кондак 6
Рвение твое о Господе узревый, Епископ Гавриил Кутатели в церкви Святых Мучеников послушником постави тя, ты же, измлада познав Христа и благодать Его стяжати паче всего вожделев, к иноческому житию единому стремился еси, дабы мирская попечения отринути и величити присно Господа и тако спасти душу твою. И, Божиим промыслом, отче, благословение облачитися в рясу иноческую получил еси, и по желанию твоему именем Гавриила Афонскаго нарекоша тя, и вкупе с ним вершити подвиги благочестия нача́л еси, и тако утешителем и надеждою народу твоему стал еси, дабы и нам, тебе уподобившеся, стезю живота временнаго проити неленостно, воспевающе присно в Троице Единосущнаго Бога: Аллилуия.


Икос 6
Божиим благоволением рукоположение в сан иерея получивый, всецело очи сердечнеи к Богу устремил еси, отче, и безупречно Богослужение блюсти возревновал еси. Обаче, убоявшеся властей мирских, домашнии твои замыслиша в мир возвратити тя и прияти супружество принудити тя. Безумным же притворивый ся, сокрушил еси козни сродников твоих, зане единому Всевышнему Богу посвятился еси безвозвратно и тако убо искушения от ближних твоих победил еси, и оттоле не смеяху противитися воле твоей. Темже уповаем на тя, отче наш, молитвою твоею воспламени сердца наша огнем Божественным, во еже угодити Господеви, и приносим ти хвалебную песнь:

Радуйся, истиннаго иноческаго делания, Богу лишь ведомаго, ревнителю;
Радуйся, суровыми обетами душу твою закаливый;
Радуйся, в недузех твоих силу Божественную проявивый;
Радуйся, дарования Небесная неленостно стяжавый и Заповедем Божиим научивый;
Радуйся, в людех сокрытыя добро́ты и дарования видевый;
Радуйся, словом молниеобразным тьмы греховныя разгнателю;
Радуйся, Богословием истинным витийства риторов победивый;
Радуйся, равноапостольный проповедниче святыя Веры Православныя;
Радуйся, духовныя твердости и смирения учителю;
Радуйся, кротостию твоею бессердечных и жестоких умолителю;
Радуйся, Словом Божиим верным спасение уготовляяй;
Радуйся, в скорбех и напастех страждущим скорое услышание;
Радуйся, святый исповедниче и Христа ради юродиве, преподобне отче наш Гаврииле!


Кондак 7
Беды и напасти, гонения и страхования дьявольская не отрешиша тя от Бога, отче Гаврииле, занеже Господь от отрочества тя ко служению иерейскому зваше, и, ревностно блюдя заповеди Божия и с радостию Благую Весть проповедуя, отче, выну обличал и направлял еси, остерегал и утешал еси великодушно паству твою, и, проповедуя, яко апостол Павел, собирал и обращал еси ко Христу многия души, с ними же в праздники святыя монастыри и церкви земли Иверския обходил еси, уча воспевати Богу: Аллилуия!


Икос 7
Нечестивыми поруган и оскорблен, паче хранил еси стойкость твою во всякое время, отче Гаврииле. Тако, единожды притекл еси к Морю Черному и молился еси пред Господем, слезно помощи во страданиих прося, обаче внезапу обрушися брег под тобою, ввергнув тя в пучину. Но понеже образ Николая Чудотворца в руку твоею бе, явися Святый Николай людем близ стоящим, указуя место бедствия твоего. Сии на помощь ти поспешаша и, извлекше тя на землю, с изумлением вопияху: «Благолепный Старец сей зваше ны на помощь ти» и вкупе сла́вляху Господа о чудеси сем. Темже убо ныне упроси Господа, отче наш, оградити паству твою, разум наш просветити и присно святым споспешествовати в помощь нам, хвалящим и величающим тя сице:

Радуйся, друже Христов и делателю неленостный вертограда Его;
Радуйся, в горних милость обретый исповеданием Веры Православныя;
Радуйся, Богослужения благолепное светило и ревнителю;
Радуйся, любве Божественныя преподателю;
Радуйся, спасения народа твоего ради тяжкий крест твой на рамо восприявый и скорбьми преукраше́нный;
Радуйся, верных предводителю и о иереех ходатаю;
Радуися, ярости демонския отгонителю;
Радуйся, служению древних отцев подражавый;
Радуйся, необоримый воине Христов, рода и Церкве Иверския велий заступниче;
Радуйся, яко бо дивный святой Саровский Серафим проповедоваше о союзе нерушимем Уделов Небесныя Царицы, о народах православных, тако и ты тяготы́ последних времен в судьбах народов наших молитвенно понесый;
Радуйся, яко да сокрушатся дияволския козни молитвами нашими, и вси правовернии людие, любовию ко Христу сплоченнии, доблестно вкупе послужат Ему в борьбе с Антихристом и со врагами Святыя Церкве;
Радуйся, праведности и мужества образе, отечества твоего славо и похвало;
Радуйся, святый исповедниче и Христа ради юродиве, преподобне отче наш Гаврииле!


Кондак 8
Со благоговением, отче, впитал еси делание иноческое в монастыри Бетании от преподобных и богоносных отцев-чудотворцев, Георгия и Иоанна, и молитвами их преудобре́нно укрепивыйся, приступил еси к служению Богу яко инок ревностный. Тако в борьбе со злом паче стали закаливыйся, удостоился еси от Господа дара ведения сердец, темже убо призвал еси на себе бурю ярости сил вражиих, яже пытахуся отрешити тя от монастыря всуе, еда како не можаху победити ни силы молитвенныя, ни упования твоего на Господа, ниже причинити зло ни чистоте, ни служению твоему, ибо любим был еси велми добродетелей твоих ради духовными отцами твоими, с нимиже вкупе возблагодарим Бога: Аллилуия!


Икос 8
Предста преподобный Иоанн первым пред Господем, Георгий же поспешив к могиле его и к оней обратився, возгласи: «Христос Воскресе!»? – и той услышав сей глас, радостне отвеща ему: «Воистину Воскресе!». Последи и преподобнаго Георгия силы оставиша, и ты, блаженне, Христовых Таинств приобщил еси его, он же, благословив тя, мирно почи, вверив Богу чистую душу свою. Зело радовашася власть имущии Церкве гонители о кончине старцев святых, абие поспешиша прервати служение в монастыри и приставиша при онем стража, в музей претворивше. Ты же, Отче Гаврииле, в Сион вернулся еси, и служением твоим паству велию паки собрал еси. Темже убо и ныне поддержи нас и настави уповати на премудрый Промысл Божий, отче и духовниче наш, и на стезю праведности направи поющих ти:

Радуйся, мудрых иноков-подвижников подражателю;
Радуйся, великий ходатаю и проповедниче веры Православныя;
Радуйся, пастырю добрый агнцев избраннаго стада, яко маяк во тьме им светивый;
Радуйся, овец отпадших несумненное упование и надеждо;
Радуйся, Бога и веры отрешенных на путь истины возвращаяй;
Радуйся, служением твоим, Богоносне отче, плоды жатвы Господния преумноживый;
Радуйся, спасшему нас от клятвы законныя кровию Своею Господу верный подражателю;
Радуйся, коварства сил тьмы молитвою твоею рассекаяй;
Радуйся, от искушений супостата народы православныя избавляяй;
Радуйся, крепосте нерушимая, властей безбожных победителю и мирских страстей низложителю;
Радуйся, верных и служителей Божиих оградо и похвало;
Радуйся, благоговейных иереев украшение и служителей кротких заступниче;
Радуйся, уныния прогонителю и обреченных смерти исцелителю;
Радуйся, покрове и защито путешествующим и пристанище тихое страждущим;
Радуйся, святый исповедниче и Христа ради юродиве, преподобне отче наш Гаврииле!


Кондак 9
Видя, яко нечестие множашеся зело во отечестве роднем, благий пастырь, отче наш, малому стаду ты явился еси. Зане в неверии и скверне греховней мнози погрязоша, темже жаждая их возвращения ко благочестию, к покаянию звати их дерзал еси, неустанно вопия им со скорбию: «О, несчастнии, во мгле сидящии, вы страхом и молчанием связани, како не ведети вам Света Христова и Славы Его? Прозрите абие, и узревше Христа, Бога нашего, покайтеся, отвратите стопы от злых стезей ваших и немолчно славите Бога: Аллилуия».


Икос 9
Возмутиша тя, отче наш, нечестивии иконоборцы, подвергше сатанинскому осквернению святыя образы Владыки Господа Иисуса Христа, Пречистыя Матере Его и Божиих святых и гонением предавше почитающих их. Ты же, не страшася смерти, яко жертву Богу, образ идола-богоненавистника, прислужника сатаны, всесожжению предал еси, и тем паче ненавидим был еси власть имущими за дерзость сию, и неотвратныя смерти за Христа ожидал еси, дерзновенно глаголя: «Не подобает величие сицевое трупу человеческому, достойно же оное токмо Христу, воскресшему из мертвых, Спасителю и Богу нашему!» Моли же Его ныне, отче всехвальне, о спасении душ наших от ересей погибельных и даруй ревность твою о Господе восхваляющим тя сице:

Радуйся, пастырю малаго стада, Словом Божиим прозрети неведящим помогавый;
Радуйся, неустанно грешников на путь Божий обратитися назидавый;
Радуйся, правителей-человеконенавистников и судий бесчестных дерзновенный обличителю;
Радуйся, творящих бесчинства сокрушителю и на путь Истины еретиков наставителю;
Радуйся, от Божия руки отбившихся, обмирщенных сердец устыдителю;
Радуйся, вознесенныя гордыни века сего посрамление;
Радуйся, крамолы иконоборцев разрушение;
Радуйся, от козней сатанинских и нашествия иноплеменников защитителю;
Радуйся, необузданных устрашителю и ересей прелестных, прогонителю;
Радуйся, благим обличением народа твоего от сна духовнаго пробудителю;
Радуйся, горделивых душ исцелителю и мглы умов наших разгнателю;
Радуйся, Благоверных супругов благословителю и в прелюбодеяния впадших порицателю;
Радуйся, святый исповедниче и Христа ради юродиве, преподобне отче наш Гаврииле!


Кондак 10
Нечестивии мытари, хулители Христа и прислужницы властей безбожных, ненавидяще тя, столкнути тя с пути истиннаго замыслиша, искушением подвергше, и в темницу заключиша тя, обаче ты коварство их обличал еси, и узников Христа ради учением в вере паче наставлял и укреплял еси, и со оными вкупе славил еси Бога. Обаче тии, иже в бешенстве сгубити тя пытахуся, спесь свою умериша, ибо ничесоже сотворити ти не можаху. Чудесем убо сим Господь, стена верным, от смерти тя укры, поместив тя в лечебницу, среди малых мира, отверженных и безумных, попустив ти истязания терпети, имже несть числа. Обаче сие ожесточение сатанинское не можаше поколебати несокрушимую веру твою, отче святый, и среди истязаний, яко отроцы три в пещи вавилонстей, продолжал еси славити и величати Бога: Аллилуия!


Икос 10
Ходатайством Патриаршим свободу паче чаяния обрет, абие поспешил еси в храм Святыя Варвары утешения у Господа искати, и тамо, зело устав, задремал и услышал еси трижды глас дивный: «Гаврииле, аз плачу о тебе!» Очнувся же, устремился еси к Распятию и узрел еси чудо, Иисуса слезы точащаго, и пал еси ниц со слезами, вознося хвалы и молитвы Господеви. Сицевое утешение получив, к службе в Сиони возвратился еси, отче, и многи люди окормлял еси, проповедуя им покаяние и приобщая их Таинством Святым. Обаче и тамо отторже тя враг от служения Господеви, по умыслу властителей безбожных, и, нищ и отвержен стал еси на многая лета, без пристанища; и зной непосильный, и хлад смертельный претерпевал еси среди плит могильных, и юродства крест приял еси Христа ради, проповедая Царствие небесное, возсылая непрестанно молитву твою горе и сим радуя Небо. Людие же, узревше красоту души твоея, служаху ти с любовию, и желаху сретения с тобою, ревностным рабом Господним, страстей победителем. Таковому о тебе произволению Божиему дивящеся, зовем ти:

Радуйся, молчанием твоим, яко огненным пламенем, терний страстей опалителю;
Радуйся, в мирския соблазны впадших священнослужителей гневный порицателю;
Радуйся, богоотступления рода своего обличителю;
Радуйся, от иереев-книжников унижавыйся и оскорблявыйся;
Радуйся, помышлений сердечных ведателю, от искушений и преступлений люди ограждаяй;
Радуйся, горнее благословение приявый, благодати Духа Святаго щедрый одарителю;
Радуйся, честностию и добро́тою душевною Небесных даров стяжателю, духом горе пребываяй;
Радуйся, из монастыря Бетании рой пчел улетевших осенением крестовым возвративый;
Радуйся, закрытая врата церковная крестным знамением отверзый;
Радуйся, наследниче подвига бессмертнаго духовных отцов твоих и братий, во Христе: Иоанна и Георгия Бетанийских, в борьбе за правду клятвою сплетенных ;
Радуйся, безбожных врагов Христа и Уделоизбранныя Иверии обличением выявляяй;
Радуйся, чуда Святаго Спиридона Тримифунтскаго повторителю, мякоть хлебную в муку, огнь и воду претворивый, радуйся, чудотворныя силы Лиц Святыя Троицы Единосущныя прославителю;
Радуйся, многих от священства мудрыми словесы назидавый и истинных иноков-монахов воспитавый;
Радуйся, святый исповедниче и Христа ради юродиве, преподобне отче наш Гаврииле!


Кондак 11
Светило избранное среди отцев святых, отче, чудный старец наш был еси, понеже низпослано ти бяше Слово горния мудрости и Ведение от Духа Святаго, от Того же и дары исцеления и помощи людем ты приял еси, и сердцеведение, и дар душ исцеления, и возвышенный дар любве. По вразумлению Святаго Апостола Павла, иже глаголаше: «Мудрость мирская есть беснование пред лицем Божиим», – со смирением и скромностию дивною предстал еси, отче, людем юродивым, пияным и никчемным именуяся, в сердце же неустанно воспевая Богу: Аллилуия!


Икос 11
Яко Андрей Блаженный, имя доброе кротостию и смирением твоим стяжал еси, и по множеству добродетели твоея безумец Христа ради стал еси, старче наш, подвизавыйся сугубо яко Затворник и Юродивый, миру непостижный, покрываяй сим святость твою и дары твоя. Обаче, о мудрый иноче, аще и миру безумен явлен был еси, ныне же почиваеши в сонме святых Церкве Иверския. Имея велие дерзновение ко Господу, моли Его паки явити нам достойных отцев и предводителей мудрых, дабы не попустити растления Иверии – удела Богоматери, дабы творити нам правду Богу со умилением взывающе, и воспевающе ти сице:

Радуйся, таинства небесная являяй, яко осветился еси светом Божественным в нечестивую пору гонений на Истину и умаления благочестия, и просветил еси народ свой святостию твоею;
Радуйся, прозорливый отче наш и молитвенниче, духовныя премудрости преисполненный, понеже разуму человеческому несть доступно постигнути открывшияся ти высоты недосягаемыя;
Радуйся, Божественным огнем зело воспламенивыйся, во овечия шкуры облаченных волков – священнослужителей обличитель был еси, яко Илия-пророк, обличавый жрецов Бааловых;
Радуйся, великому Моисею подобный, четыредесять лет Крест свой носивый, ибо хранил еси в себе слово Божие, столпе нерушимый, и не крепость человеческую, но Силу Божию явил еси;
Радуйся, яко пророк Давид милость Божию во смирении заслуживый и проповеданием Благовестия Христова, яко пращею, козни Безбожных сокрушивый;
Радуйся, Иоанну Крестителю подобне, грешных неустанно у диавола исхищавый и покаянием к Богу возвращавый;
Радуйся, любве Божия апостоле, Иоанну Богослову подобный, ибо такожде вкупе с даром любве тайны Божия и власть над духи нечистыми в дар от Бога приял еси;
Радуйся, ибо испытанием радовался еси, наставляяй и нас терпением страданий в вере закалятися;
Радуйся, ибо в скорбех и в вечных гонениих первомучеником подобен еси, выну плача токмо о гресех твоих;
Радуйся, ибо ты скорбел еси о души твоей, Велиару неугодней, яко о покойнице, и, причитая, взывал еси яко разбойник благий: «Токмо помяни мя, Спасе, во Царствии Твоем!»;
Радуйся, муже небесный, бегавый величия мирскаго, темже убо да славят отныне и во веки притекающии к тебе дивная дела твоя;
Радуйся, Пречистую Богоматерь умоляяй об умножении рода Иверскаго;
Радуйся, святый исповедниче и Христа ради юродиве, преподобне отче наш Гаврииле!


Кондак 12
Во смирении и кротости, терпением велиим многая лета ожидал еси благословения ко священослужению, и, узрев в нижайшей скромности твоей желание Богу служити, Патриарх Ефрем призва тя паки ко алтарю, облачив тя в ризы иерейския и приобщив Таин Христовых, по внушению горнему во святую обитель Самтавро посла тя. Обосновался еси убо тамо, жителю Небеснаго Иерусалима, во Иерусалиме Новем, во Граде Владычнем Мцхета, у куста купиннаго Святыя Нины, просветительницы Иверии, в малей келии. С трепетом приношению Жертвы бескровныя и проповеди Царствия отдался еси, чудотвореньми вразумляя инокини и паству твою, указуя им врагов видимых и невидимых, и, моляся непрестанно, обитель от бед оградил еси, и благоукрасил еси башню святаго Царя Мириана спасенными крестами и образми́ твоими, денно и нощно славя в Троице Единаго Бога: Аллилуия!


Икос 12
Яко настоящая грядущая зревый, отче дивне, силою свыше, многая чудеса сотворил еси ты любве ради к нам, укрепляя Веру и являя силу Божию, в немощи совершаемую; и паче в тяжцем недузе, блаженне старче наш, претерпевал еси боли нетерпимыя, до конца дней твоих неся тяжкий крест страданий телесных. Прозрев же в Духе о часе кончины твоея, отче святый, помолився пред образом Святителя Николая Чудотворца о благословлении народа и Отечества твоего, тихо мир сей оставил еси, исполненный добродетельми твоими, и к великому сонму святых отцев приобщился еси; и по завещанию твоему яко древняго инока-старца предаша земли мощи твоя, в циновку завернувше я. И абие святыя мощи твоя яко источник чудес неоскудный явишася для народа Божия и кладезь целительный от болезней и недугов, яко сокровище благодати Духа Святаго и знамение оставления многих грехов наших и избавления от болезней, душевных и телесных. Темже убо спешим с велиею радостию в обитель Самтавро, идеже ты, отче, почиваеши, и всякий с верою притекающий к тебе, приняв помазание маслом от лампады твоея, яко же от тебе благословление, получает сим здравие духа и телесе, и немолчно славит тя сице:

Радуйся, терпением мир благодатный стяжавый, и, яко старец-инок не единожды ценою жизни твоея злу противоставый, моли выну Христа Бога о спасении душ наших;
Радуйся, яко и по смерти нам живым и близким остался еси, желанный и ангельский помощниче в веце тягостнем;
Радуйся, венцем исповедническим увенча́нный, и по кончине твоей озаряеши нас, яко солнца горячий луч, и непрестанно призываеши нас ко Христу;
Радуйся, ибо пристанище твое вблизи купины есть крепость и сила дивная, и радость наша, яко владельцы есмы благоухающаго сокровища, благодатию одаряющаго;
Радуйся, ибо по промыслу Божиему и мати твоя, тебе последовавши и ставши на путь исповедания веры, в иночестем подвизе подвизашеся, и погребена бысть таможде, во святей обители близ мощей твоих;
Радуйся, в беда́х сущим благое прибежище, якоже огнь Божественный, светяй от усыпальницы твоея, палит козни богоборцев, и теплым победным светом осеняет ны, от греховныя тьмы ограждая;
Радуйся, ибо не токмо вернии, но ныне и ленивии, и маловернии спешат приложитися к сосуду с нетленною кровию твоею, и молят ти ся о милости; ты же, внимая мольбам, исполняеши благая желания их, и в скорбех радость щедро подаваеши;
Радуйся, ибо видяще архиереи чудеса, изливающаяся от могилы твоея, и множество притекающих к ней, величающих тя яко великаго инока, исповедника и юродиваго, сопричислиша тя лику святых;
Радуйся, ибо видяху мнозии священнослужители исцеления, приходящая от мощей твоих, и ныне вкупе с паствою своею величают тя яко великаго святаго, возносяще ти хваления и мольбы;
Радуйся, блистанием чудес твоих народ Божий щедро одаривый, ибо образи твои суть источницы мироточивии, Духом Святым исполненнии;
Радуйся, ибо ныне радостию преисполнен град царственный Мцхета, и радуется обитель Самтавро святыя мощи твоя имущи, людие же Иверии притекают в ню неустанно, воспевающе святость, исцеления и пророчества твоя;
Радуйся, небурное пристанище спасения погибающих и надеждо ненадеемых, яко велий ходатай явился еси страждущим, и Божественною силою щедро одаряеши всех к тебе притекающих, и неусыпным покровом париши над отечеством твоим и народом твоим;
Радуйся, святый исповедниче и Христа ради юродиве, преподобне отче наш Гаврииле!


Кондак 13
О, преславный и предивный пастырю и угодниче Христов, святый исповедниче и Христа ради юродиве, отче наш Гаврииле! Господь наш Иисус Христос благослови тя на дела велия, разуму человеческому неудобоприемная, и оказа ти богатую милость в животе сем временнем, а по святей кончине твоей ущедри тя даром со дерзновением ходатайствовати о душа́х грешных. Приими и ныне малое сие моление наше, с любовию ти приносимое, и теплым предстательством твоим испроси у Владыки Христа Бога избавити нас от греха и нечестия, от бед и напастей, и наследники Царствия Небеснаго быти сотвори, да с тобою вкупе немолчно воспоем Богу: Аллилуиа.

(Этот Кондак читается трижды. Затем читается Икос 1 и Кондак 1. )

Молитва первая

О, всехвальне отче Гаврииле, исповедниче и юродиве! Украшение иноков, священников венче и ангелов соратниче, избранный воине богохранимыя Грузии и защито необоримая от напастей и бед всем молящимся ти, дерзновенный ходатаю пред Господем о всех с верою к тебе притекающих и иныя надежды не имущих, обреченных оградо и немощных покрове! О, соратниче сонму исповедников и юродивых, всечудне отче Гаврииле! Избрав издетска житие ангельское, облеклся еси в схиму в пору торжества нечестия, и ныне содействием твоим подаеши нам мудрость, и стойкость, и силу непобедимую для защиты Веры и Отечества нашего, ибо бесчисленныя орды врагов Истины над Святым Православием и ныне, якоже прежде, коварно надругатися тщатся, действующе силою лукаваго зверя, для растления народов Божиих и претворения их в служителей тьмы. Мы же, во мгле греховней пребывающе, не в силах есмы им противостояти, обаче ходатайством твоим, отче святый, умоли Христа Бога удостоити нас исполнения пророчеств твоих и явити нам Царя, на царство Богом помазаннаго, доблестнаго правителя и предводителя нашего. Яви его, яко явил есть Давида царя Израилю, дабы правити ему с верою, добротою и истиною и жити попечением о народе нашем, Удела избраннаго Материю Божиею, дабы нести Крест Господень, неотступно следуя Ему в Вере Православней, дабы преумножити былую честь и крепость ея, дабы бесчисленнии демони окаянством своим не смели прочее хулити Христа Бога нашего в пределех ея и сквернити Святую Веру нашу. Всесильною и теплою молитвою твоею, отче наш, покрый и укрепи Святейшаго и Блаженнейшаго Католикоса – Патриарха всея Грузии, Архиепископа Мцхетско-Тбилисскаго и Митрополита Пицундскаго и Цхум-Абхазскаго, отца нашего Илию, всех патриархов Святых Православных Церквей Твоих и всех священнослужителей: митрополитов, архиепископов и епископов и весь священнический и монашеский чин, и весь причет церковный, и всех молящихся и подвизающихся в Церкви Святей Православней, и всех Православных Христиан!

О, Святый отче наш Гаврииле! Зряще заслуги твоя пред Господем, подвигом апостольским подобным, и ведающе о велицем твоем к нам милосердии, по завету твоему, со смирением молим ти ся об освобождении от музейнаго плена Нерукотворнаго Образа Спасителя нашего и водворении его в Соборную церковь имене Его святаго, в преддверии явления Ацкурскаго Нерукотворнаго Образа Пречистыя Девы и Славнаго возвращения в страну Иверскую образа Портаитиссы, Вратарницы, «яко величайшия споручницы вызволения нашего от сатанинских сетей и искушений антихристовых», по пророчеством святых отцев наших, ибо в знак наступления последних времен покинет образ сей Гору Афонскую и осветит паки Иверию, удел свой избранный. Обаче свирепствует еще нечестие по наущению дьявольскому в Уделех Богоматери, и народи наши углебоша во гресех и лукавых сетех мира сего, и мы же, леностию объятии, со страхом чаем величественнаго и страшнаго Втораго пришествия Спасителя нашего Иисуса Христа. Темже молим тя, отче святый Гаврииле, отжени от нас ужас кары Божия за неверие и беззакония наша, и милосердием твоим умоли Христа, Бога Всемилосерднаго, помиловати души наша и просветити сердца наша Православием и благочестием, дабы возрастати в нас добродетелем, а, по отходе от мира сего, в Царствие Небесное внития нам вымоли, дабы со ангельскими сонмами быти выну поющими Господу Богу нашему, во светлых селениих Его вечнаго бытия, вкупе со Святители нашими, и с тобою, отче, быти выну воспевающим пресвятое имя Его, со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь!




Молитва вторая - пред иконою Святаго Гавриила Самтаврийскаго

Пресущественным светом блистаеши, отче наш, всеблаженне чудотворче Гаврииле, Божиею силою преисполненный, прошения наша исполняеши и мир даруеши с верою притекающим ко святому образу твоему и со умилением пред ним преклоняющимся, и горячее моление тебе воздающим: не отрини нас, устыдився беззаконий наших, обаче помилуй и укрепи, умоли Господа, дабы устояти нам и победити демонския полки, лесть и злодеяния мира сего, а народу нашему даруй силу в одолении коварных врагов и Святую Православную Церковь нашу в мире сохрани. Святый и честный образ твой, отче наш Гаврииле, явлен нам во спасение наше, стойкости ради в вере и служении Богу во ожидании милости Его; Ты же, Христа верный служителю, всехвальне отче Гаврииле, огради ныне паству твою от всяческих напастей и бед, да молитвами твоими беспорочно про́йдем путь жития нашего и обрящем Отечество Небесное.

Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Слава Отцу и Сыну и Святому Духу ныне и присно во веки веков. Аминь.

Господи помилуй (3 раза) Благослови!

Христос, Истинный Бог наш, молитвами Пречистыя Твоея Матери, святаго славнаго и всехвальнаго чудотворца и отца нашего, преподобного Гавриила Самтаврийского, преподобных и богоносных отец наших и всех святых, помилует и спасет нас, яко благ и человеколюбец. Аминь.




1 Гавриил Святогорец, Иверский (Афонский), Прп. (ХI в.); Дни памяти: Май 13, Июль 12. Родом из Грузии, подвизался на Афоне, в пещере недалеко от Иверского монастыря. За свою благочестивую жизнь удостоился явления во сне Пресвятой Богородицы, велевшей ему спуститься к морю и принять стоящую на волнах икону, которая станет заступницей Иверской обители. Гавриил-святогорец возвестил об этом игумена Павла, пройдя по воде, как по суху, обрел икону Божией Матери и торжественно принес ее в обитель.

2 Анчийский Спас: Нерукотворный Образ Спасителя - одна из наиболее чтимых святынь Грузии. В древности икона находилась в монастыре Анчи в Юго-Западной Грузии; в 1664 г. была перенесена в Тбилиси. Предание церкви рассказывает о принесении образа ап. Андреем Первозванным из Иераполя в Кларджети и отождествляет эту икону с Нерукотворным Образом Спасителя из Эдессы. До настоящего времени хранится в Государственном Музее Искусств Грузии.

3 Ацкурский Нерукотворный Образ Божией Матери: один из наиболее чтимых чудотворных образов, по преданию, является копией нерукотворной иконы Пресвятой Богородицы, также связанной с именем ап. Андрея Первозванного. В грузинской хронике Картлис Цховреба (XI в.), повествуется о том, что Пресвятой Богородице, согласно жребию, для проповеди досталась в удел Грузия, но по велению Господа туда был послан ап. Андрей проповедовать христианство. Он получил из рук Богоматери Ее нерукотворный образ, запечатленный на обычной доске, которую Она приложила к Своему Пречистому Лику, и этот образ прославился великими чудесами. До настоящего времени хранится в Государственном Музее Искусств Грузии.





Автор Акафиста: Тинатин Мчедлишвили
Тропарь-Кондак: Архимандрит Кирион (Ониани)
Русский перевод: Нателы Дурглишвили
Редакторы: Нона Намгаладзе, Наталия Бахарева
Текст на церковно-славянском языке редактировал иеромонах Силуан (Ярославцев), Церковь святых Сергия Радонежского, Серафима Саровского и Викентия Сарагосского,
Московского Патриархата, Милан, Италия.

(Вторая исправленная редакция)
Тбилиси, 2018 г.